எனக்கும் அது தேவைதான்!

பாகம்பிரியாள்

செய்தித்தாள் வந்தவுடன் தினம் பாகப் பிரிவினைதான்!
ஓடும் பேருந்தில் இடம் பிடிக்க அப்பாவுக்குத் தேவை ஒரு பக்கம்!
அம்மாவிற்கோ மாவு சலிக்க கைக் கொடுக்கும் தோழி!
அண்ணியும் அவ்வப்போது தேடுவாள், பக்கங்களை.
அலமாரியில் புடவையின் கீழ் அழகாய் விரிக்க!
தம்பிக்கு அவசியம் வேண்டும், வேலைச் செய்திக்கான பக்கம்!
சுட்டிக் குழந்தைகளும் தேடியே வந்திழுப்பர்
கத்திக் கப்பலும் பொம்மையும் செய்து பார்க்க!
மீதம் தனித்திருக்கும் ஒரு தாள் என்னைப் போல்.
எனக்கும் அது தேவைதான்.
என்றோ முகிழ்த்த காதல் முறிந்து போனதால்,
முகத்தை மறைத்துக்கொண்டு கண்ணைத் துடைத்துக்கொள்ள!

====================
  Aug 25, 2009

சென்னை ஆன்லைனில் வெளியானது